نصايح لاي بنت بتفكر تخرج مع.......

بعد موضوع ازاي تعرفي عريسك من اكله
واللي انا انبسط بجد انو عجبكم
اقدملكم مجموعه تانيه لاي بنت بتفكر تخرج مع خطيبها او واكيد الخروجه دي فيها عزومه غدا اوعشا
والتوبيك ده بخصوص الجزء ده من الخروجه

نخش علي النصايح
1_الاول لازم تعرفي ان الشوكه والسكينه بيتمسكوا من الطرف..يعني مش من الوسط ولا من البوز زى الخنجر ولا من فوق طبعا

2_العيش ..اوعي تفضحينا وتقطعيه بسنانك..ولا الرغيف نصين بايدك وكل نص في لقمه وتحشري العيش بيتقطع بالسكينه فالطبق..وبعدين تخدي لقمه لقمه بالعافيه
(قال يعني نفسك مسدوده..معلش اضغطي علي اعصابك شويه)
وبعديناما تروحي ابقي حفي زى منتي عوزه

3_الشوووووربه..ابوس كعب رجلك...بند الشوربه ده مهم جداا
الشوربه تتشرب من غير صوت خالص ومن غير ما تقعدي تنفخي فيها زى القهوجي اللي بينفخ في حجر للزبون
والشوربه بالمعلقه وبدووون صوت..سخنه بقي مولعه برضه من غير صوت..وتسيبي تلت الطبق علي الاقل مش نلهطيه لاخر نقطه

4_الرز طبعا..طبعا بيتاكل بالشوكه..اوعي ايدك تتمد علي المعلقه واوعي تغرفي من طبق الرز if وتعبي..اوعي..الرز بالشوكه وكانك بتبوسيه مش بتاكليه

5_المكرونه السباكتي...برضه بالشوكه تتلف علي طرف الشوكه لحد ما تخلص وبعدين تحطيها فبؤك من سكات..مش تشفطي المكرونه عود عود

6_السمك (مشكله)شوفي..بتفصلي اللحم عن السفا ..ازاااي؟؟؟
تقطعي اللحم من النص بالطول وبعدين تفردي اللحم علي الجانبين ولما تخلصي نحيه....متقلبيش السمكه(بلاش فلح)
بعد كدا شيلي السلسله بالشوكه والسكينه وحطيها فجنب الطبق..وكملي اكل النص التاني
وبدل الفيلم الهندي ده...نصيحه متكليش سمك خالص وقولي مابحبش السمك وخلصي نفسك

7_الجمبري(اذا كنتي عارفاه) اول ماطبق الجمبري ينزل...بصيله بأرف واحتقار شديدين
(قال يعني زهقانه من اكل الجمبري الجامبو فبيت بابا)
واتنهدي جامد وقولي ..برضه؟؟؟
وبعدين تروحي قاطعه راس الجامبرييايه بالشوكه(انا في عرضك انسي المصمصه دلوقت)

8_البطاطس...سواءمسلوقه او محمره..اوعي تهرسيها علي الرز وتدي. ..لا.لا.لا.لا
بالشوكه حته حته وانت زي ما تكوني هتعيطي من كتر ما البطاطس صعبانه عليكي

9_الفاكهه...لو الفاكهه فيها بذر.....طلعيه من بؤك بالراحه وحطيه فايدك وهي مقفوله وبعدين في طفايه السجاير اللي علي الترابيزه(اوعي يا حبي من نظام التفتفه للبذر....انسي)

ولما تخلصي اكل تحطي ايدك علي بطنك اللي بيني وبينك عصافيرها بتصوصو من العينات اللي كلتيها وتقوليله انا مش ممكن....انا عمري متفجعت كده..ده انا قدامي اسبوع عقبال ماكل تاني
وبعدين تمسكي الفوطه اللي دايما موجوده علي الترابيزه من غير لازمه....وتبوسيها قال يعني بتمسحي بؤك
وبعدين تستأذيني منه لدخول التوالت لاصلاح ماكياجك ...وتخشي التواليت وتطلعي شنطه ايديك وتفتحي لفه الفول والطعميه اللي جيباها معاكي وبالهنا والشفاااااااااا

الشبااااااااااااااب....اوعوا تفهموا البنات فكره كده ولا كده ....دول كلهم رقه ...بس الكلام ده عشان يكونوا بالصراحه كتيييييييييييير احلي

بتمني يكون التوبيك عجبكوا ....ومستنيه ردودكم

هههههههههههههههههههههههههههههههه


التوبيك جامد اخر حاجه يا سوكا.....بس ايه بقا لزوم الفضايح دي


ماتخلي الطابق مستور........خلي الشعب يعيش